anonymouspoet’s blog

Ek aadmi apni kulhaadi liye

roz usi raaste jangal ki ore jaata
hai 

rehguzar hote hain raaste ki mitti aur
kuch anjaane patthar

kal raat ki narm baarish se, chaand
tapak gaya tha boondo me

geela hai abhi tak sara jangal
chaandani se

uske pairo ki chhaap mitti pe chhoot
jaa rahi hain 

anjaane patthar uske saath koodate
phaandate 

pehchaan bana rahe hain 

lakadiyaan magar seeli hain 

uske choolhe jo saans bharengi, 

kadave dhuyein ko sarka kar

wo jaanta hai ki rozmarre ki
tarah 

jab wo sooraj kaat kar laayega

shab tab hi aayegi uske ghar me

aur jab geeli raat aayegi

toh use chaand chadhana hai seene
par 

aasmaan se utaar kar 

mehsoos karna hai ki is raat ka raja wo
hi hai

kal subhe jab suraj kaatne ka manzar
laut aayega

usi mitti se wo apne kadmo ke nishaan
chunane wapis jaayega

aur anjaane pattharo se ek din dosti ho
jaayegi

jo rehguzar rahe the kabhi, kuch der ke humsafar ban
jaayenge

pic: Matheran Trip

This poem is just a figment of imagination, and has no relevance to any person living or dead! 

aankho par paaniyon ka karz hai zara,
fikra wajah ki nahin, bewajah hai kuch zindagi me
utarega ye karz dheema dheema,
kadva dhuyan jo aankho me hai bhara

saans me atkaa hai jo dhuyaan bada nukeela hai
humne maanga nahin zindagi se kuch jo mila
kabhi kabhi kismato ko apne haatho me cheela hai

baisaakhiyon ke sahare dard nahin chala karte,
aarzoo chalti hai
jab kabhi hume mila, dard hi tha wo silaa
dil kabhi zara jalaa, to dard -e- dil ko aarzoo bana diya

ek gaadhi lakeer hatheli pe kheenchi to taqdeer bana diya
tamaam daulato me lutata dil, dil nahin fakeer bana diya

 reh reh kar saans par bhaari padi zindagi par
dekha kiye sab magar koi raqeeb na reh gaya

barse baadal, paaya saahil, paayi manzil
har aarzoo paas rahi, magar koi kareeb na reh gaya

raat ka nasha aankho me taaza surkh jo tha
subhe talak aankho se barasta reh gaya

pyaas rahi der talak, paani guzar gaya falak se
labo ne chakhaa boond-dar-boond,
magar halak tarasta reh gaya

kaaghazo ne waade kiye the kuch,
sauda tha jazbaato ka
magar wo kaaghaz aadha jhootha aadha sachha reh gaya

baarish bhi hoti rahi saude ki
raat se subhe talak peer barsaayi
magar main hisaab me kachha reh gaya

Varun

hataane ko andheraa main shab jalaata raha, 

wo raat ko bedardi se bujhaate rahe

kor pakad kar aatish ki, main garmaahat jodta raha

wo barf pighlaakar jazbaat bujhaane ki sujhaate rahe

main ik raah pakad kar raasta banata raha

wo har raah ke aakhir me ek raah banaate rahe

ek main tha, unhe manzil maan paas aata raha

wo rehguzar jaan mujhi se door jaate rahe

main apni wafaa me fanaa hota raha

wo apni bewafaai pe bhi itraate rahe 

- Varun

Pic: Lonavala Trip

Kal raat der talak barsaat hoti rahi
mano chaand pighal raha ho
dheeme dheeme tapak raha tha falak se
barasti rahi chaandani toot kar 

aur ab ye aalam hai ki,
ghar ke saamne wali sadak bhar gayi hai chaand se
ghar me mere bhi kuch cheete khidki par jame hain

neeche hi kisi ne tashtari me saja liya hai
rakh liya hai quaid karke chaand ka ek tukda
aur kuch bachcho ne uchhal diya hai kood kar
khwahish ko ek doosre ke upar
dekha to wo sarobar ho gaye the
usi chaand me jo pighal kar toota tha kal raat

 intezaar kar raha hoon is baar
kab tootega doosra chaand dubara
to main bhi apni khidki pe
tashtari rakh, chaand ko kamre me le aoonga

-Varun

Sulagte huye jazbaato ko yun

Phoonk kar na bujhaao

Ik aatish niklegi saanso se

Thoda tum jaloge aur thoda hum

Jazbaat ke thande hone tak

Jo jal chuka hai aaftaab hai

Mere sir pe aasmaan ke judwe ko na hataao

Na koi taara tootega

Na koi khwaahish poori hogi

Aarzoo ke chhor se

Ehsaas ke kone tak

-Varun

Scribbled some lines while I was in the auto,
Mumbai under heavy down pour…..

Pic taken from the Internet

Thak gaya sooraj jalte jalte,
paani me ise aaj bujhne do

Geeli si raat aayi hai chaand lekar

Is chaandani me aag dubone do

Hain lehare bequaraar,
kinaare ki pyaas tarasti hai

Boondein bankar baato si, sitaaro se

Halke halke barasti hain

Ek gumnaami gar nasheman hua hai,

ise naam me na yun khone do

jalte bujhte khwaabo ke
manzar kuch aur bhi hain

aur kuch der talak mujhko sone do….

Varun

Ghamo se nikalkar, ek siski bhari hai jeene ki

Chalak rahi thi zindagi paimaane si

ek koshish kari hai peene ki

tum jise paana chaaho, main koi khitaab to nahin

aarzoo meri bhi hai, saans chalti hai meri

jo chaaha hai tumne sirf wahi likha hai

aur jo chaaho wo likho, main koi kori kitaab nahin

beete lamhe sirf khwaahish me, khud ke intezaar me

khareedane ko apne aap ko hi

biktaa raha khud apno ki hi baazaar me

mila hoon khud se main, ki ab na khone doonga

jaage jaage se khwaab hain, sahra guzarne se pehle

na main inhe ab sone doonga

khalish ki jhadi jo lagi hai wo tham jaayegi

shor chaahe jitnaa kar lo tum

ye khaamoshi ab gum na hone paayegi

–Varun