checkmate’s blog

Dekho baithi daal pe koyal gaati hai..

Soorya kiran paani mein jhilmilaati hai..

Sard hawaa sookhe patte udaati hai..

Har jhonke se tann-mann sihra jaati hai..

Patjhad ke mausam mein bhi subah muskaati hai..

Nayi konpal,nav jeevan ka,sandesh laati hai..

Sihre tann ko mandhim si dhoop lubhaati hai..

Hansti kaliyaan,bhanwaron ko khoob rijhaati hain..

Patjhad ke sookhey patton sa,durbhaav hatey..

Nayi konpal sa sadbhaav phir mann mein jaage..

Prem ki meethi dhoop hum sabhi ko sukh de..

Kaliyon se honth muskaaen,jeevan mein rang bhar dein..

Nav varsh ki har subah aapko khushiyaan dein..

Har raat sajey,deepawali si,prem ki jyoti se..

Har pal sukhmaya,har oar sneh ki kaliyaan ho..

MERI SHUBH KAAMNAEN,AAPKA NAV VARSH

MANGALMAYA HO..

shubh prabhaat

Aapka har pal mangalmaya ho..

Kitni chaahat,kitne waadey,kitne sapno ka hai mausam..

Kitna khoya,kitna paaya, kuch ismein bhi uljhe hain hum..

Naye josh se phir sajaenge,naye swapn dhoondh ke laaenge..

Ek halchal se,hum sukh pal se,mann aangan ko mahkaenge..

Sapno ki jyoti badhaenge,is vishv ko sikhlaenge..

Hum hriday-hriday se jodenge,asambhav sambhav kar jaenge..

Sadbhaav le ke antarmann mein,ek koshish bhi kar jaen hum..

Nav varsh ki naveen prerna sang,har oar khushi phailaen

HUM..

AAP SABKO

***NAV VARSH KI SHUBHKAAMNAEN***

HI FRIENDS..

WISH YOU ALL A BEAUTIFUL

SUCCESSFUL

PROSPEROUS

HAPPY NEW YEAR

2008

(:……..KEEP SMILING….:)

Kyon bikhartey jaa rahey hain,maanavta ke gharaonde?

Kyon nahi ehsaas baaki,apnatva deep jaate raonde?

Kyon sisakta mann nahi,jab dekhta atyachaar ko?

Kyon nahiye haanth badhte,rokne,dush vyaapaar ko?

Kyon bandha hai mann itna,nahi roondhta bhed bhaav se?

Kyon siley hain honth itne,apraadh dekhte chup chaap se?

kitna vibheets,kitnakhokhla,kitna nirdayi aas paas hai..

Kho gayi hai aatma,apnon pe bhi avishwaas hai..

Wo sabhi khushiyaan milin thin jo,humein bhagwaan se..

Swaarth se bharey,lobhi mann ne kho dia,apmaan se…..

Ab bhi jaago ,jo bacha hai,usko bacha lo..

BAN KE ‘MAANAV’ SWAYAM KA UDDHAAR KAR LO..

HAAN..AB BHI..DOST HAIN

Pichle dino,do doston ne,apne hi dost ko goli maar di,wah mar gaya..

KYA WO DOST THE??

Samaachaar patr mein nikla,dost ne dost ko bhojan mein vish dia,

wah mar gaya..

KYA WO DOST THE??

Ek purush dost ne ek mahila dost ke vishwaas ko chalaa,wah

nadi mein kood gayi..

KYA WO DOST THE??

Dhan ke lobh mein,ek dost ne,bank se nikalte waqt,doosre

ko chaaku maara..

KYA WO DOST THE??

Dosti ya mitrta ki pavitrata ko chhaley,apmaanit karey,

to aap kahiye,

KYA WO DOST HAI??

Kaise insaan hain hum,dhirey-dhirey har rishtey ki,garima bhula di

bachi thi dosti…

AB…KYA DOST HAIN??

Hain,haan ab bhi hain,par aise ghatnakram,mitrvat bhaav karte hain kam,PAR MUJHE VISHWAAS HAI..

HAAN..AB BHI DOST HAIN!!

Band aankhein karke main,

Parvaton ki chotiyon pe,girti barf mein ,khelti hoon…

Phisalti hoon,jharnon mein bheegti,

nadiyon ke veg mein bahti hoon…

Kabhi kinaare,harey-bharey vano mein,

titliyon ke peechey bhaagti hoon…

Kaliyon ko dheerey se chhooti hoon,

phoolon ko pyaar karti hoon…

Chidiyon ke kalrav ko sunti,khush hoti hoon,

kabhi thandi hawaa mein,jhoomti,

aanchal lehraati ghoomti hoon…

Kabhi door se aati,baansuri ki laya mein,magn ho jaati hoon,

to kabhi,

hari ghaas ke makhmali bichhaune ko,sahlaati hoon…

oas ki boondon ko,haathon mein le kar,

gaalon ko sajaati hoon,

baarish ki baochhaaron ka mazaa leti,

mann mein sondhi mahak basaati hoon….

Uchhalte -koodte pashuon ko nihaarti hoon,

tab darti nahi,haathiyon,sheron ko bhi chhu paati hoon..

Soorya ki laalima ko mehsoos karti hoon aur,

us laalima mein nikharti,prakriti ke saundarya pe reejhti hoon…

aankhein khol kar,is samaaj ko taulti hoon,

paarkhi nahi hoon,so maun rah kar subah ko samajhti hoon…

kya kahoon,kitna bataun,kuch bolti kuch bhoolti hoon,

aap kahte hain main subah ko pyaar karti hoon,

main hoon ki subah ko jeeti hoon….

Shubhr varn hain,shwet kesh hain,

peet vastr se hain pehne..

Pushpon ka haar galey mein hai,

hariyaali unke hain gahne..

Jharno,nadiyon,saagar ke shabd,

jaise shlokon ka hai gunjan..

Pakchhiyon ke swar,mandir ki ghanti,

soorya aarti ka hai deepak..

Sab oar dhoop sugandh rachi,

kand-kand mein hai ajab mahak..

Phir se savera aaya hai,liye

nayi lalak,ek nayi chamak….

(:SHUBH PRABHAAT:)

Har din ek naye roop mein ,maine bhor ko paaya hai..

Aaj bhi ,Prakriti maa ne isey nayi tarah sajaaya hai..

Girta jharna,bahti nadiya,

hain phool khile,udti titliyan,

chalti hai thandi ,mand hawaa,

jhoomte vriksh ,gaati chidiyaan..

Dekho ab nanhi kiran jagi,

hai nabh mein halki si laali,

poorab se Sooryadev ki ab,

hai sawaari aane waali…

Maine is mann mandir mein,phir bhaktideep jalaaya hai,

lagta hai jaise kand-kand mein,Prabhu ne amrit chalkaaya hai..

Amrit naino se pi lo,jee bhar kar isko jee lo

Kal naye roop mein aaegi ,is bhor ko mann mein sanjo lo…

(:SHUBH PRABHAAT:)

(:shubh ho raatri:)