Karna rukhsat mujhe to yoon karna..
Zindagi mein haadse ,naa jaane kitne hue..
.jpg)
AAVASHYAKTA..
Kiski?.. kitni?.. kyon?..kab?
Prashn anek..
Uttar..vibhinn…
Aur aavashyakta..???..
Har ek ki…
Ye vivashta nahi..
Vyavastha nahi..
Ye to soochak maatr..
Jigyaasa ki..Pragati ki..
Gati jeevan ki ..
Abhivyakti ki..
AAVASHYAKTA VYAKTI KI …
-lata
Usko bhi toofaanon se ladna hota hai..
Jo jeewan shikhar pe khadaa hota hai..
Mushkilein ang hain is jeewan ka..
Sabhi ko tang galiyon se guzarna hota hai..
Kabhi -kabhi..
Raas kyon aati nahi auron ke ghar mein raunak ..
Kyon khaali lagta hai daaman harpal apna hi..
Kyon khatakti hai kisi aur ke chehre ki hansi..
Sabki aankhein barasti hain,dard milta hai..
Kabhi -kabhi..
Saath hai jo bhi, uski kadr, karni hogi..
Tabhi khushhaal hum sabhi ki zindagi hogi..
Ashk bhi to zaroori hain ,khushi samajhne ko.
Aakhir kaanton se bhi zeenat hai hoti.
Kabhi - kabhi … 
-lata
.jpg)
Wo phoolon se naazuk sapne..
Na jaane kahaan kho gaye..
Hausalon se bhaare shabd ..
Hawaa ho gaye..
Jinhone tha kiya wadaa saath umr bhar rahne ka..
Waqt ki lehron mein kahin gum ho gaye..
Jo kaante nikaalte the rooh se meri..
Jaane kyon ab nashter chubhone hain lage…
Mere puraanepan ko the jo saraahte sambhaalte..
Wo mere apne naye ho gaye..
- lata
Door jaane ka khauf,dard aur nami..
Lab hain khaamosh ,magar ..anginat baatein,hidaayatein..
Teri aankhon mein bhi hai,meri aankhon mein bhi..
Tootkar choor hue khwaabon ki chubhti kirchein..
Zindagi bhar ke liye zakhm liye rooh ka gumm…
Pyaar ke sab sunhare lamhe,sisakte.. tadapte..
Teri aankhon mein bhi hai,meri aankhon mein bhi..
Aaj hamesha ke liye juda hone ki kasam uthaane ki majboori..
Teri aankhon mein bhi hai, meri aankhon mein bhi..
Mat ro ae mere dost ,mat ashk bahaa..
Ishk ka hashr sadiyon se yahi hota rahaa..
Na yoon ho ki ashk le jaaye bahaa humaari tasveerein..
Jo..teri aankhon mein bhi hai,meri aankhon mein bhi..
bhoomi ke dulaar se janm le kar..
aakash ke taley prakriti ki adbhut kriti…
ek nanhe se beej se ankur aur paudhe ka roop leta..
aaj..bann ke sabhi ka aashraya..adig khada ye ..
vruksh..
chaanv deta sabhi ko swayam dhoop sahta…
phalon se bhookh mitaa sabki,swayam trupt sa..gharon ke roop mein to kabhi indhan ke roop mein..
sabka hi to sahaara hai..ghar ke kisi buzurg sa..ye..
vruksh..
varshon tak sabko kuch na kuch deta..
badle mein sirf apnatv ki,thodi si dekh bhaal ki aas mein..
jaane kab ladkhadaane lagaa,jhadti pattiyon ko dekhta.
thoonth sa hota rahaa par…jeeta raha auron ke liye..ye..
vruksh..
Aaj chita mein jal rahaa,aur..log poonch rahey..
ye kaun hai? to kuch log yoon muh pher chal diye,
jaise jaante hi na hon..us vishaal hriday ko..
us kaaya ko jisne har mod pe sneh diya..
kyon tha aisa? kyon na apne liye jiya..
kyonki wo to tha..
vruksh…
na khaamoshi,na ashk na veeraane..
ye dard ke saaye hain anjaane…
shabd aate nahi labon pe..
teesate dard ko koi kya pehchaane..
jinmein apne sapnon ki jhalak dekhi..
wo hi chal diye lekar khwaab dafnaane..
kaise koi apna jaane kisi ko..
jab apne hi lagne lagein anjaane..
paon mein phir se chubhi meri hi hansi..
aur aankhein lagi dabdabaane..
kaise lab muskaan sajaa sakte hain bhalaa..
jab..dil hi lagey cheekhne chillaane..
sil gaye honth bhi sadaa ke liye..
maine band kar diye ab khwaab sajaane…
Meri parchaiyaan bhi saath mera chhor rahin..
Meri abhivyaktiyaan chan shabdon mein simati jaa rahin..
Apni saanson mein uski saanson ka ehsaas jiye jaa rahi..
Asweekritiyon mein sweekritiyaan talaashey jaa rahi..
Main swayam mein swayam ko dhoondh rahi…
Dhundhli aakritiyon mein spashtataa nihaar rahi..
Aansuon se bheegey rangon ko phir sanwaarey jaa rahi..
Tootey swapnon ki kirchen palkon se nikaaley ja rahi…
Lahu-luhaan aankhon ko,uske aane ke swapn ka marham de rahi..
Main asambhav mein sambhav dhoondh rahi..
Bikhari hui sabhi tasveerein samet rahi..
Yaadon ke album mein kareene se sajaaye jaa rahi..
Sabhi sukhpalon ko dukh ki ghadiyon se tauley jaa rahi..
Jeewan ke antim palon mein aarambh ko dekh rahi..
Main mrityu mein jeewan dhoondh rahi…
Dhoondh rahi..
