Kabhi in roz ki aawaazon mein, kuchh aisa mil jaata hai,

Be-aawaaz ,dheere se dil mein utar jaata hai..

Kah jaata hai beeti hui anginat kahaaniyaan..

Dhundhli padi hui yaadon ko,nayaa sa kar jaata hai.

Namm aankhein talaashti hain un khoe hue lamhon ko,

Kuch begaano ko kuch khoe hue apnon ko..

Badalti hui tasveeron mein,kuch puraane rangon ko …

Nayi kitaabon mein dabe hue puraane pannon ko..

Jhijhakte hue bebas mann khojta rah jaata hai..

Lekin..waqt ki raftar se haar ke thak jaata hai..

Mook ho kar bas ehsaason ki bhawar mein doobta jaata hai..

Kabhi in roz ki aawaazon mein…

 

                             

 

Mere chehre pe padte waqt ke nishaan..

Lakeeron mein ubharte,syaah baalon ka rang harte ..

Gambheerta badhaate,nazariye ka rukh badalte …

Mere chehre pe padte waqt ke nishaan..

 

Kuchh waqt aur beeta ,sab apni raah chalte..

Pad ke kad badhte,jeewan ko gadhte gadhte…

Kuch aur gahre padte,mujhe aur vraddh karte..

Mere chehre pe padte waqt ke nishaan..

 

Kitne hain log,lekin..ab phir se main hoon tanha…

Jaane mere wo apne hain mujhe kitna yaad karte..

Kya dekh paungi main ,phir se unko,marte marte…

Din b din hain badhte, mujhe benoor,bebas sa karte..

Mere chehre pe padte waqt ke nishaan..

 

EK GAHRI SAANS…SISKI SI…AUR…LAMBI KHAMOSHI………

 

Aakhir wo din aayaa,ab..,raah takte takte..

Bejaan tann ko mere ,sab arthi ka roop dete..

Mere apne hain kahaan ? zaraa ye dekh to lete..

Apne saath le jaa rahi hoon main..bas..

Mere chehre pe padey hue waqt ke nishaan ..