Peer basi mann beech re ..
'
Preet anokhi tumse meri ,virah anootha priyatam..
Deh - praan saa saath humaara,door ho ke bhi sang hum..
Yoon hai na Kaanhaa ?
'
Premras mann mein yoon hai ghulaa,kitna baantoon ,na ho kam..
Murli ke sangeet sa, ye'goonje,ghat-ghat hardam..
Kyon hai na Kaanhaa ?
'
Phir bhi hai mann mein saadh ,tumhe dekhoon kho sanyam..
Phir bansi chendo tum ,mugdh main naachoon cham-cham..
Sunte ho na Kaanhaa?
'
Aao ki panghat nirjan se,lagte hain gumsum..
Van-upvan hain murjhaaye jabse gaye tum…
Aaoge na Kaanhaa?
'
Mere sab swar tumhaare hi liye hain ,geeton mein ho tum…
Meri aankhein tarasti hai, kabhi mil jao tum….
Sakal brahmaand ke maalik,tumhe hum poojate hain…
Karo hum pe kripa drishti , sneh barsao tum..
Phansi majhdhaar mein nauka,ho khevanhaar tum..
Karo nishphal har ek durbhaavna yehi hum maangte hain..
Vividh roopon mein poojit ho,sarvshaktimaan tum…
Kya pakshi ,vriksh,ya maanav, jidhar dekhein udhar tum…
Sabal nirbal mein baste ho,sabke aadhaar tum..
Chhup ke rahte ho hum mein hi,magar hum dhoondhte hain..
Badaa vyakul hua hai mann isey samjhao tum…
Drishya adrishya ke ho sang,srishti shringaar tum….
Pratham naman sadaa tumko mere parmaatma..
Tumhaara naam hi karta tript har aatmaa..
O..vaijanti roop tera…
Kaise na mohey ye manwa..
Chaandni chhitkaata chandaa..
Bhi chhup ke baithaa baadal ma..
Abahin to jhalak dikhaayi hai..
Na roop ujaagar hai tera..
Jo poorn daras dikhlaaye to ..
Kaise hatenge nayanwa?
Paayal jo chhankaati jaaye.
Us prem diwaani ko dekho..
Sab dekh rahey hain bas usko,,
Wo dekh rahi hai bas…. Kaanhaa…
Bahut din ho gaye aate kinaare,
Aaj paani mein utar ke dekhte hain..
Zindagi ko chaar pal rakh ke kinaare..
Doob ke jal mein khud ko dhoondhte hain..
Prakriti ke roop mein kho kar sabhi kuch..
Prerna ka naya anubhav ji rahey hain..
Jab tumhe the baandhate, ashaant tha mann…
Bandhano ko tod tumko paa rahey hain..
Kya hua jo door ho,chup chaap ho?
Mann mein har pal sirf teri goonj hai…
Band aankhon se tumhein main dekhti hoon..
Har taraf mujhko tera ehsaas hai..
Bheegta hai tann bhaley hi neer se..
Mann mera dooba hai kabse preet mein..
Tumko ho na ho pataa par sach hai ye..
Bas tumhaari neh maala jap rahey hain..
 |
Tum ho meri prerna..tum hi meri aasthaa..
Jo bhatak jaun agar..to tum dikhaana raasta..
Na pataa kis oar jaun..kaun sa mera padaav..
Apne hi sang le chalo tum,ab wohi ho ghar mera..
Kyon bhatakti phir rahi,is dwesh maaya moh mein..
Shaant ho mann jo milo tum,daras paun jab tera..
Main kahin na haar jaun,beech hi majhdhaar ke..
Ab to aao o re Kanha,bin tere yahaan kya rahaa..
Na main koi aatm-jyoti,na mujhko hai kuch gyaat..
Prashn chinh sa hai ye jeewan,uttar dhoondhu din raat..
Kaheen hain sneh ke gahre saagar,kaheen tapta registaan..
Kaheen pathreeli raah kanteeli,kabhi sheetalta veeraan..
In oonchi-neechi raahon par chalti,akeli nitaant..
Mann mein mere vyaakulta,badhti,kabhi pad jaati shaant..
Dekha maine chalte-chalte,chaahey kitney hon meley..
Par jeewan - path,aisa rastaa,hotey hain sabhi akeley..
Muskaatey-manmohak chehre,par hriday dukhi aur klaant..
Raam naam ki maala japte,taaki ho sukhaant..
Main bhi unsey kahaan alag,asankhya dosh mere saath..
Mukti miley mann mera chaahey,darsh miley saakchhat..
Shabd shaant hain,pratidhwani si aati hai..
Mann veena ke taar chhend jaati hai..
Shyaam ki bansi mann veena sang gaati hai..
Barbas paeron mein thirkan jagaati hai..
Jaadui si jhankaar kyon uthi mann mein..
Eksaath asankhya kamal khiley antarmann mein..
Vaani mein kaisa anjaana kampan hai..
Kaisa adbhut geet aatma gaati hai..
OM hi chaaron oar dikhayi deta hai..
Omkaar ka hi to hota gunjan hai..
Param shaantimaya,charam saatvikta si hai..
Aaj mujhmein ek nayi bhavukta si hai..
Bhaati hai ye bhaavukta mere bhaavuk mann ko..
Utsaahit karti hai jaise is tann ko..
Shabdon mein vardnan nahi kar paati hoon..
Ya,shabd asmarth hain sabkuch vardnan karne mein..
Mujhe bhautikta mein mat baandho..
Ab us anant mein khone do..
Ye deh maatr hai ek pinjra..
Ab is panchi ko udne do..
Mujhe bhautikta mein mat baandho..
Is panchtatva ki kaaya ko..
Phir panchtatva mein khone do..
Ye jyotipunj jo mastak mein..
Usey us divya mein leen ho jaane do..
Mujhe bhautikta mein mat baandho..
Jeewan mrityu ka chakra toote..
Maya ,moh ka path chhoote..
ab us aseem ke paas chaloon..
Mujhe sab bandhan tod ke jaane do..
Mujhe bhautikta mein mat baandho..
Hariyaali se saje van bhi hain..
Hain ret ke tapte registaan..
Vaise hi hain gyaani,snehpoorn..
To hain,agyaani,krodhi,insaan..
Nirmal,nirjhar, hain prem pagey..
to hain pathreele,sookhe viraan..
Kuch shaant chitt,hain ramey hue..
Kuch pareshaan,dukhi,hairaan..
Kuch saagar si gahraayi waale..
Kuch parvat si oonchaayi waale..
Kuch soorya si tez chamak waale..
Kuch chandramaa jaise shaant-shaant..
Par sabmein baste hain nirvikaar..
Kabhi saakaar,to kabhi niraakaar..
Jisne maana usne jaana..
Jisne chaaha poore tan mann..
Usko hi milte hain bhagwan..
