checkmate’s blog

                    POLAMMAA   [concluding part ]

“Kahaan rah gaye the Hari?” maine behad rookhe swar mein poochha..Hari bas meri taraf dekhte hue jaane kya soch rahaa tha,phir achaanak peeche mudaa aur is tarah dekhne lagaa jaise kisi ka intezaar kar rahaa ho.”Ab kya dekh rahey ho Hari? Bologe kuchh..Polammaa kaisi hai? Wo aaj bhi nahi aayi..theek to hai naa?”  Par..Hari bina boley bas jaane kiski raah dekh rahaa tha. “HARI…” maine thoda chinta aur gusse mein uski chup se chidh ke zor se kahaa..”kuchh bataoge kya hua? Kiska intezar kar rahey ho?”  Lekin..iske pehle ki Hari kuchh kah paataa,kisi ne zor se mere dono paer pakad liye….

“Arre…kaun hai..hato..” Par ye to Polammaa thi..kuchh murjhai si..jo mere paer chhorne ka naam hi nahi le rahi thi…”Polammaa…hato to..ye kya kar rahi ho? chhoro mere paer..” ..”NA..memsaab ..memsaab na hota to hum kal mar jaata o memsaam..kaun deta paani humko..memsaab..hum mar jaegaa to kisi ko bhi nahi pataa hoga na memsaab..do din baad sab jab pataa karegaa ki Polammaa kyon nahi aata to hi maalum hoga na memsaab…”
Kisi tarah se khud ko chhuraate hue maine usko chup karaane ko daant lagai..” Ye sab kya bole ja rahi ho..chup ho..beemaar ho,band karo rona..aankhon pe asar ho jaega nahi to..”

Hari jo ab tak chupchaap khadaa ye sab dekhe jaa rahaa tha,udaas aur gambheer sa, bola..”theek hi to kah rahi hai ammaa..memsaab kal jab main iske ghar gayaa to ye subah se bhoonkhi pyaasi bukhaar aur pate dard se behaal kholi mein padi thi…sabke kaam aati hai ye par jab isko madad karne ka bakhat aaya to koi ek boond paani bhi nahi laaya..main bharaa paani..isko khilaa ke dawai de kar,hospital se bukhaar ki dawaa la ke ,khilaa kar tab gayaa tha,abhi bhi iske ghar hote hue aaya hoon so der hui..isko manaa kiya par maani nahi,boli memsaab se milna hai bhaiya.”

Polamma beawaaz roye ja rahi thi aur uski baat ki sachchai ne Hari aur mujhe bhi rulaa diyaa..Hari to aansuon ko chhupaata ghar ke kaam mein lag gayaa aur main..Hari se Polammaa ko chai dene ko kah jhat se apne room mein aagayi..aur zindagi ki is kadwi sachchai ke saamne asahaaye si mehsoos kar mann ke gubaar ko aankhon se chhalkaati rahi..roti rahi..

Kitni beraham ho jaati hai na ye zindagi..Polammaa se kuchh aur jud gayi thi aatmaa..Lagaa.. na jaane kitni Polammaen hongi jinhe zindagi ki pathreeli zameen anjaane hi jaane kitne ghaav aur peedaen deti hogi..Aurat hi aurat ke jeewan ko har paristhiyon pe taul sakti hai,samajh sakti hai..aur is ghatna ne Polamma ko thoda aur dhyaan ka kendra banaa diya..lagta jab tak yatha sambhav main isko sukh de sakun de doon..wahi maine kiya..

Aaj jab jaana hai is ghar, is shahar ko chhor ke, to mann ajeeb si peeda se vyaakul hai..lekin..zindagi to nahi rukti aur niyam mein bandh ke hum insaan har waqt apna mannchahaa kaarya nahi kar sakte..”Chalti hoon Polammaa..ab jaana hoga na..apna khayaal rakhna..Hari..Polammaa ka dhyaan dena..ladna mat.”..

“memsaab..jaane ko nahi kaho..kaho jaa ke aataa hai memsaab.”
Polammaa..kitni bholi ho tum bhi..jaane kab ab idhar aana ho..aur kya pataa ho bhi na..jo aa hi gayi yahaan to..KYA TUM HOGI? Main ye soch ke rah gayi..bas muskuraa ke haath hila kar vida li..chal padi ek naye safar pe..peechhe rah gayi..aansuon se dhundhlaati ek  tak mujhe jaate dekhti..Polammaa..

                                             POLAMMAA [  PART 2]


Badi mushkil se do joon ki roti aur ghar chal rahaa tha Polammaa ka.

Kabhi Durga Puja mein kisi ki di hui saari aur sweater se,kambal milne se uski chhoti si kholi mein uska guzar ho jaata tha,par uska pati aksar aa jaata aur jaate waqt adhikaansh saamaan utha le jaata.
par majaal hai jo Polammaa ne kabhi kuchh bhi kahaa ho.Main chidh jaati uski chuppi par,”bolti kyon nahi usko,kahaan se laogi sab eksaath? saal bhar ekattha karti ho ,wo ek jhatke mein sab le jaata hai!”,wo boli..” kya bolega memsaab,pati hai,maatha pe teeka lagaaya hai uske naam ka..memsaab..hum ko mann mein achchha bhi lagta hai,wo humko uske khatir alag kiya na,ab wo dono humse maangta hai..Bhagwaan ka photo bhi utha le gaya memsaab ..hum baad mein dekhaa to bahut gussa hua. Memsaab hum uska banaaya bhaat bhi nahi khaata,bua ko paisa de deta hai,wohi banaa deta hai..kahey ko bua ke paise ka kha bua ko bojh dena hai na memsaab?”


Ishwar ne bhi jaane kis mitti se banaaya tha usko.Santaan na hone ke kaaran uske pati ne doosri shaadi karli aur alag ho gaya tha,ek din usne hi mann ki peeda baanti thi mujhse, boli ” memsaab hum bhi nahi roya tab uske aagey,kyo rota? jab usne pehle hi fikar nahi kiya to ro ke main kya karta,wo hamaara bua rahta hai na paas mein,hum uske paas aagaya,wo usko kholi mein laaya tha memsaab,hum usko bol diya mera kholi khaali karne ko.” Main bas ek tak dekhti hi rah gayi usko..itna swabhimaan..waah Polammaa..phir maine kahaa ” Polammaa tum naaraz nahi apne pati se? Akele rah gayi tum? ,wo boli ..” Kahaan akelaa hai hum,memsaab log hai na aur ye chhotaa babu bhi to hai..hai na oooo…chhotaa babu..” kahte kahte jhat se meri beti ko utha ke khush ho khelne lagi uske saath..mujhe vichaaron mein uljhaa ke…kitna kathin jeewan aur kitni saralta..dhanya ho Polammaa !

Ek din tabiyat kuchh theekna hone se Hari hi chai banaa laaya,Polammaa ko chidhaane ke liye usko aadha cup chai  di,”MEMSAAB…ye Hari bhaiya dekho humko kitta kam chai diya hai ,pao roti bhi nahi deta,hum bola ki memsaab humko deta hai ye maanta nahi..hum bhookha rah jaega na memsaab..” . Maine kitchen mein jaa kar usko bread di aur Hari ko daant lagai [warna Polammaa rooth jaati na ],
“kyon pareshaan kar rahey ho Hari? Aur chai do usko..” kahte kahte main dekha chai khatm thi,so maine meri chai jo kuchh thandi karne rakh di thi usko di,wo sharma ke boli,”dekho Hari bhaiya..memsaab deti hai,ab diya nahi to maar khaoge.”, Hari bhi khush hota uski daant khaa kar..

Ek din jab subah wo nahi aayi to ghar jaise soona sa lag rahaa tha..wo shaam ko bhi nahi aayi to main ghabaraa gayi . Hari ke haanth paet dard ki dawaa [ Polammaa ko aksar hota tha aur is dawaa se araam bhi mil jaata tha ] aur kuchh khaana pack karke  maine diya aur usko Polammaa ke ghar se hote hue uske apne ghar jaane ki hidayat di.
jaise taise raat beeti,lekin subah Polammaa phir nahi aayi..mann mein jaane kya kya vichaar aane lagey..kahin kuchh …nahi wo theek hogi..kahaan rah gayaa ye Hari bhi….Arre..wo rahaa..kitni der kar di…,

” Hari……….”

                                             
                                                            contd…

                                                                                POLAMMAA

Kitni smritiyaan hain is ghar se judi,aur yahaan mere ghar mein kaam karne waalon ke saath.Is ghar mein aayi thi to 4 saal ke bete aur 8 mahine ki beti ko lekar teesri manjil tak chadhna bhi muskil lag rahaa tha.Ek to khadi ,puraane tareeke ki bani seedhiyaan aur doosre bachche bhi chhote,par ye teen varshon ka waqt kaise beet gayaa pataa hi nahi chalaa… Kitne saral aur zimmedaar staff ne sambhaali thi meri grihasthi . Shaayad meri slip disc ki problem bhi unhe aur sahriday banaa gayi thi. Aankhein bhar aayin ,badi mushkil se sabse nazarein churaa ke aansoo ponchh liye.

”Memsaab aap jaa rahaa humko achchhaa nahi lag rahaa na memsaab..” Polamma ki aawaaz sunke chaunk gayi..mud ke dekhaa 45-50 ki dubli si kaaya,kaale safed baal aur chehre pe wahi chirparichit muskaan..”Arre..Polamma tum kab aayi…is waqt kaise? ” wo boli..”memsaab aap chalaa jaega to phir hum akela pad jaega,humko chhota babu kahaan milega..kaun poochhega polamma kaisa hai memsaab..” Uska ‘memsaab’ kahne ka tareeka itna pyaar bharaa hota tha ki main barbas muskuraane lagti,khaas taur se baat ke antim mein ko kheench kar bolna..

Polamma..ek dakshin Bhartiya parivaar se thi jo shaayad uske janm ke pehle bengal mein aakar bas gayaa tha.Wo dono sanskaar ka adbhut sangam thi,Durga Puja aur Pongal,tyohaar chaahe jo bhi ho Polamma  khoob utsaah se manaati,chaahey ek tukda barfi se hi kyon na ho…

                                                                       contd..

Good Morning….Main phir se aa gayi aapsab se milne .. pehchaana mujhe ?? Arre… Main Khusbu hoon… yaad aaya…main aayi thi milne ek baar …bahut dino pehle…Pata ab main aur bhi good girl ho gayi hoon…haan sachmuch. Ab main class 1 mein pahunch gayi hoon na, maa kahti hai sabhi ko tum nahi aap kahna chahiye.

Pataa hai ….mere ghar mein bhi is garden ki tarah khoooooooob dher se flowers khile hain,very beautiful hai…hmm. aur pataa main jab maa se chhupti hoon to phoolon mein hi kho jaati hoon…ha ha ha..bada majaa aata hai…maa dhoondhti hi rah jaati hai..ha ha ha.Aur bataun …mera na.. happy birthday bhi aane waala hai…5January ko…maa ne kahaa school to band hoga to sabko toffees kaise dogi,kitni buddhu hai na maa?..Arre bhai jab school khulega tab le jaungi na…hai na…aap bataiye?

Pataa..ab meri chhuttiyan hone waali hain…BADAA MAJAA AAEGA….good girl ki tarah padhai kari thi na exam mein isliye ab hum kahin ghoomne jaenge..oye oye..Aap bhi jaa rahey ghoomne kya ??

KHUSHBU..

Arre ..maa bula rahi….jaati hoon…aap bataana laut kar ki kahaan gaye the,thik? photo bhilaana..main bhi laungi agar maa ne di to..

KHUSHBU…

Ja rahi…school hai na..ok..bye..tata..good luck..aur wo kya…maa kahti hai..mmmmmmm….HAAN….TAKE CARE..bye bye.M A I N   P H I R   A A U N G I …MILNA ZAROOR…..

Hello… Kya aap sab mujhe jaante hain? Nahi ?? Main to aap sabko jaanti hoon :).

Main hoon Khushbu. Maa ne rakhaa tha mera naam..mujhe phoolon ke beech rahna bahut pasand hai na,isiliye.

Kitne pyaare hotey hain na phool? Hai na ? Aur….kabhi dekha hai titliyon ko udatey? Kabhi idhar kabhi udhar  udati hain..kabhi is phool to kabhi us phool pe baithati hain..ekdam confuse.ki kaun sa phool best hai! ha.. ha.. ha.. buddhu hoti hain na?

Aur wo kaaley -kaaley bhanwarey,kaise zzzzzzzzz….. karte aate hain,jaise apna aeroplane chalaa rahey hon:). Shor karte hain..’hat jao..hat jao..mera plane aa raha ‘. Kitna mazedaar hota hai na? Achchha bolo..aapne kabhi chhui-mui ko dekha hai? Chhui-mui nahi jaante! Ha..ha..ha..:) kaise buddhu ho aap bhi? Arre baba…’touch -me-not’ jaante ho? Lo chhui-mui nahi jaante bassss touch-me-not jaante ho! Ha…ha..ha..ek hi to hai dono.Usko chhoone pe kaise sharma ke apni pattiyaan band kar leti hai na! Isiliye to usko chhui mui kahte hain..ittaa bhi nahi pataa aapko?

Pata hai..main abhi 6years ki hoon par maa mujhe ‘dadi ammaa’ kahti hai:)! Maa bhi na…kitni mazedaar hai..wo mujhe dher saare naamon se bulaati hai …Par…”DADI AMMAA”?? Aap hi batao,agar main dadi ammaa hoon to dadi ammaa kaun hain?

Achchha  ….abhi chalti hoon ..maa bula rahi.Phir aaungi haan! Milna mujhe..bada mazaa aaya…

AAYI MAAA………….

                                              VAIDEHI… [CONCLUDING PART]

“If you are lacking oxygen with me,you are free to go ,anywhere you want.!”

Ye zahar bujhe teer maar ke chal diye Rajat office ko aur…de gaye kabhi na bharne waala ghaav.

Aakhir kya kah diyaa tha maine aisa?? Yahi to kahaa tha ki aaj ki stri ko Namita jaise hi hona chahiye,twarit nirnay lene ki kshamta  zaroori hoti hai.

 Basssss…Rajat ke ulaahane aur vyangbaad chalne shuru hue to zehar de ke gaye..”Aise log hain tumhaari saheliyon mein,ye ab pataa chalaa hai. In jaison se to main milna bhi gawaanra na karun aur tumhaare kaaran bardaasht karna padaa aaj.”

Maine poochha .”.hua kya aisa bhalaa ?”

” Dekho Vaidehi ye bhaley hi kabhi pati patni the ,par aaj ye alag ho chukey hain,tum jaanti bhi ho ye ek hi ghar mein rah rahey?”

Maine kahaa “to kya hua? Aaj ghar bhi kahaan milte hain asaani se,zaroori thodi hai saath rahne ka galat hi arth ho?”

Aur mera itna kahna hi aag mein ghee nahi,petrol ka kaam kar gayaa..Aag gusse ki aisi bhadki ki  mere mann ko chhalni kar gaye…

Bahut krodh aaraha tha Namita pe.Bataa nahi sakti  thi mujhe ye sab? Kyon karti main ye  charcha Rajat se? Krodh ne jab dimaag pe bhi apna adhikaar kar liya to maine Namita ke cellphone pe sms kiya,aur usko baahar bulaaya milne ko. Vyast hone ke baavjood bhi usne waqt nikaala milne ka.Taya kiye waqt pe hum miley coffee shop mein..

Dekhte hi wo boli “Vaidehi..sab theek to hai na? Yaar maaf kar ,local se aane mein der ho hi jaati hai..” Maine kahaa  “tu to car se chalne waali ladki thi,local se kabse safar karne lagi?” Pehle to sahaj hi uttar dene ja rahi thi wo par ,mere swar ke vyang ne usko rok diyaa. Aise ajeeb si nigaahon se dekhne lagi mujhe. Maine seedhe hi sawaal kar diyaa,” Ab Saurabh ke saath kyon rah rahi tu ? kya ghar bhi nahi the aur naukari ki tarah ?”

Mujhse nigaahein churaati wo boli,” maaf kar de Vaidehi.. par teri alag soch ke kaaran nahi samjha saki tujhe?” Meri soch.. “Meri to tumne sochi hi nahi warna usko saath to na laati kam se kam..Hum sakhiyon ke beech hi rah jaati ye sab baatein par..Saurabh ne Rajat ko sab bataa diya hai aur tum soch bhi nahi sakti  kaisi mahaa bhaarat hui ghar mein aaj! Kyon kar rahi ye sab?BOLOOO…?” Main lagbhag  mein cheekh hi padi thi uspar..Uske jawaab ne phir se mujhe sawaalon ke bawandar mein uljhaa diya…

Namita ne bataaya ki uske divorce ke baad ,ghar mein har waqt khamoshi chhayi rahti thi,usne is khaamoshi se bachne ke liye naukari kar li…Lekin..uska naukari karna hi  usko bhaari pad gayaa..khaamoshi ko todta wo toofaan aisa aaya ki sab kuch hamesha ke liye tod gayaa..

Bhai bahan ka naata bhi nahi sah sakaa us zor ko..Maa to pehle hi nahin thin,aur papa beemar the to ghar mein bhaabhi ki ikchha haavi thi..Sabne Namita ki shaadi ke baad raahat ki saans li thi ki tabhi divorce ho gayaa,aur Namita waapas aa gayi..Kuch waqt tak to sab theek rahaa par naukari karte hi  pralaya aagayi..Namita ka bhabhi ko apni tankwaah  dene se manaa karna bhaiya ko bhi nahi bhaaya..AUR ..Sab alag ho gaye..                     

Ghar bhi miley aur akele shaayad rah bhi leti, par logon ne akeli jaan ke uska jeena mushkil kar diyaa..Har waqt ke darr se bachne ke liye, usne paying guest banna chaaha ,aur paper mein advertisement diyaa..Ittefaq se Saurabh ne usko dekha aur Namita ko apne hi ghar mein rahne ko kahaa..As a paying guest…Mann mein saurabh ke prati lagaav shaayad baaki tha aur uske sath ka lobh bhi tha, ki dost ki tarah hi sahi ..saath to hoga..

Saurabh bhi shaadi naam ki sanstha se apna vishwaas kho chuka tha, to khudko poori tarah apni naukari mein kho chuka tha..Dono saath rahne lage..Par ab bhi samaaj ne nahi bakhshaa .Anargal baatein hone lagin.Aakhir ab… unhone bhi.. phir se saath rahne ke liye, phir se shaadi karne ka faisla kiya.

Maine poochhna chaaha, kya bhrosa  hai ki dobaara bhavishya mein beeta kal khud ko nahi dohraega? par poochh nahi paayi….Maine aakhir mein bas itna poochha ..”Namita… kya ye pyaar hai ya samjhauta??

Namita..meri Namita.. Aaj ki naari ki meri jeewant pratima..Namita..uski ki aankhein barasne lagin..bechain lahje mein sirf itna boli…”Koi ghar bhi to hona chahiye na jeene ke liye Vaidehi…bol naa.??”

Main Vaidehi…kya kahti usse??Kya jawaab deti usko…?? Inhi prashno ke jawaab to khud hi dhoondh rahi…kabse..Kya hai ‘ APNA GHAR..??”

Hai koi jawaab to bataiye mujhko aap bhi..Aaj poochhti hoon aapse.. aap sabse …..MAIN …                         

                                          VAIDEHI…..

                                            VAIDEHI…. [PART 2]

Subah neend khuli to badan toot rahaa tha,sar mein bhi tej dard tha..fever bhi tha..Mann zaraa bhi nahi tha uthne ka..Maa ki yaad aarahi thi,bukhaar hone pe kaise pareshaan ho jaati thin..Dhatt..Ab main to khud maa hoon..ab bachpan bhool jao Vaidehi..chalo utho.

 Abhi uthne ki himmat juta hi rahi thi ki Rajat kamre mein aagaye..Rajat ko dekh ke lagaa shayad ab patidev maathe pe haath rakhenge,kahenge rahne do Vidhu,[Rajat mujhe isi naam se bulaate hain,] thodi der araam karo main davaa de deta hoon..Aankhein band karke unke sparsh ka intezar karne lagi ,par..” ab to uth jao..sunday ka matlab kya saare din soti rahogi?”,arre..ye to….to kya main adhik hi aas karne lagi hoon??

 Aankhon mein aansoo liye ,chupchaap baathroom mein daakhil ho gayi..aur nal ke shor mein apni siskiyaan dhoke mann halka karne ki asafal koshish kar waapas aayi..

Kitchen mein chai banaate hue naashte ki bhi taiyyari karne lagi..Maa ji ko aur Rajat ko chai de kar apna cup liye ,dheere se chhat pe aagayi..subah subah phoolon ki khushbu aur pakchhiyon ki chahak taazgi se bhar deti hai..Aate samay ek crocin bhi leti aayi thi,bukhaar badh gaya to kaise hoga sab? jaldi se chai ke saath nigal gayi goli..

Ab theek hai..thodi der to khuli hawaa mein saans le loon..” Vidhu… arre jaldi se do cup chai aur nashta bhejo to…” .Uff!!ho gayaa… chalti hoon..” Aayiiiiii….”

    Sunday aur sab ghar mein…sabki pasand ka kuch na kuch to hona hi chahiye na khaane mein,yahi soch jaldi jaldi haath chalane lagi taaki waqt pe khaana mez pe laga sakoon. Tabhi phone baj utha…”hello..”  “Kya Vaidehi ,bhool gayi ? Station aana tha na ,mujhe lene?Ab tere ghar kaise pahunchun bataa??” Phone uthaate hi Namita ki gusse bhari aawaaz ..Uff..bhool hi gayi thi ye aaj aarahi. Jaldi se usko ghar ka pataa bataa ke na pahunchne ki maafi maangi..”Aajaa na !Ghar aake lad lena baba..”

Phone rakh ke Rajat ko aur maaji ko Namita ke aane ki baat batai..Swaati bhi aunty se milne ki baat sun khush hui .Main bhi jaldi se kitchen ki taraf bhaagi..sab kaam nibta loon  taaki aaraam se baat to kar sakun usse..Sab kaam nibta ke ghar vyavasthit karke, khud  bhi taiyyar ho ke uthi hi thi ki door bell baji..  

Sabko Namita ke aagman ki soochna de mai bhaagi darwaaze ki taraf..Aakhir chaar saal ke baad mil rahi thi apni bachpan ki saheli se..

Darwaaza kholte hi ..chaunk gayi..Saurabh??Aur yahaan??Tabhi Namita ko dekha.Wo peechhe khadi muskuraa rahi thi..”Andar nahi bulaegi?” Namita ki aawaaz pe jaise neend se jaagi..”Haan ..aao na..aaiye na aap log..”

Sab se parichay karwa ke ,Rajat aur Saurabh ko baat karte chhod Namita ka haath pakad ke seedhe kitchen mein kheench le gayi..”Arre..kya hua Vaidehi?” “Kya hua?? Ye Saurabh ko kahaan se le aayi? Tumhaara to div…..”shabd adhoore hi chhod diye..Kya kahti shaadi ke do mahine baad hi to dono alag ho gaye the ,phir ab??

“Mere boss hain Saurabh,Vaidehi..” “Kya???” main is khulaase se pareshaan ho gayi..kya kar rahi ye..kahin aur nahi kar sakti thi naukari..? Usne jaise bhaanp liya mera khayaal..”Agar wahaan bhi ye boss ban ke aajaata to???”

Apni is saheli ko dekh main hamesha ‘aaj ki  samarth naari’ ki jaise paribhaasha samajhti thi..Aaj ek baar phir uski baat ne mujhe ehsaas karaaya samarth naari ke roop ka…..

Khair..khaana khaa ke sab baaton mein aise uljhe ki waqt ka pataa hi nahi chalaa..shaam ki chai ke baad Namita aur Saurabh ne humse vida li aur milte rahne ka waada bhi..Unke jaate hi Rajat behad uhade swar mein boley,”aainda se door rahna in logon se..samjhi?” Main avvaak si dekhti rah gayi…Jo insaan do pal pehle itne achchhe se mila sab se unke jaate hi ..kya hua??

  Par..zindagi ki bhaagdaud mein ulajh ke sab bhool gayi..Raat jab bistar pe leti to Rajat ke wo shabd phir se kaanon mein goonjane lage..

“Aainda se door rahna in logon se..samjhi?” Kyon?????

                                                            contd.

                                                          VAIDEHI…

Shaam ki chai ka cup lekar chhat pe aagayi..Shaant..Ekaant mein..Sooryodaya aur sooryaast dekhna mujhe hamesha se bhaata tha..Kshitij mein us laal tapte goley ko aahista-aahista thanda hote dekhna aur dheerey -dheerey andhkaar mein uski rashmiyon ko vileen hotey dekhna kitna rahasyamayi..kitna aakarshak hota hai…                                

Sab pakshiyon ko bhi apne gharaondon ki yaad aajaati hai ..Dekho to kaise jhund ke jhund ,shor machaate jaa rahey jaise bachche school se chhutti hone pe bhaagte hain apne ghar ki oar..                                                            

.Apne ghar…‘APNE GHAR???’  Sahsa is shabd ne jhakjhor diya mann ko….Kya hota hai ‘apna ghar’?Kaisa hota hai?? Kya ek makaan jahaan kuch log rahte hain aur jeewan ka aadaan pradaan hota hai,wo hi hai ‘apna ghar ‘??  “Maa…..Kahaan ho?”  Swaati ki aawaazne chaunka diya. ‘Oh.. main to uska home-work karwaana to bhool hi gayi..”"Aayi betaa..”

Swaati ka home-work karwa ke kitchen ki oar chali,par..aaj jaane kyon ..mann mein wo utsaah,wo tezi nahi thi mujhmein. Kuch tha jo rah rah ke dastak de rahaa tha vichaaron ko..“APNA GHAR??”                                        

Kya waqai ,aaj bhi,hum striyon ka koi apna ghar hota hai ?Kitni oonchaiyaan naap li humne par…aaj bhi makaan ko ghar banaane ke baad bhi ,kya wo uska hota hai ??Kahte hain bhaav hi mahatvapoorn hote hain,parantu bhaav kya ek tarafa hi hone chahiye?? Sabkuch sahne-karne ke varshon baad bhi ,zaraa si chook ‘APNE GHAR” ko “PARAAYA” banne  mein  koi waqt nahi lagaata.To??..Jahaan bachpan beeta,pal ke badi hui ,kya wo? Nahi -nahi ,wo to maayaka hota hai.To jahaan byaah ke aayi wo? Wo to sasuraal hai.Phir ??Jahaan pati ke saath grihasthi basaayi kya wo hai “Apna ghar”? Par usko to pati ka ghar kahte hain na sab,phir??

Inhi vichaaron mein khoyi jaane kab khaana banaaya,kab sabko yantravat khilaa diya ,pataa hi nahi chalaa..Sab kaam nibtaa ke bistar pe aake leti to ..aaaahhhhhhhhh…ab nishchint hoon.Kal sunday hai,chalo achchha hai,thodi der se uthi to chalega..Kab aankhon ne khulne se inkaar kar diya aur dimaag ne vichaar karne se..aur neend ne apne aagosh mein liya ..kya pataa….

                                                                                                                    [contd..]