Bahut door hoon par tujhse juda nahi hoon main
Parchai hoon teri par phir kyon tere saath nahi hoon main??..
Log kahenge ke main bedard hoon, khudgarz hoon
Par kya sach mein tere pyaar ke kaabil nahi hoon main??.
Jo mere khwaabo mein, socho mein, khayalo mein hai shaamil
Ussi shaks se aaj puchta hoon..”kya tera apna nahi hoon main?”
Kuch jazbaat dil mein aise bhi the jo hamesha se chup rahe
Par aaj unn jazbaaton ko alfaz mil gaye hai
Aaj unn jazbaaton ka karzdaar nahi hoon main…
Jo mohabbat ki daastaan khamoshiyon se guzre
Usme bhi bahut dard aur jazba hota hai,
Har panna padh liya jaye,aisi koi kitaab nahi hoon main…
Kabhi-Kabhi apne likhe hue alfaaz bhi apne hisse ki zindagi jee lete hai
Ab kisike dil mein chupa hua koi ehsaas nahi hoon main…
Jaanta hoon, aapne bhi kabhi suni hai woh dil ki pukaar ko
Ab yeh na kehna ke woh awaaz hi nahi hoon main…
Har ilzam, har shikwa “khwaish” seh jayega iss jahan mein
Bas…kabhi yeh na kehna ke ab tera nahi hoon main….
“KHWAISH” naam hone ki bhi ek wajah thi is dil ke paas
Par aaj…baaki koi khwaish nahi hoon main….
Kuch baatein hum se suna karo,
Kuch baatein hum se kia karo..
Mujhe dil ki baat bata do tum,
Yun na khamosh raha karo..
Jo baat labon tak na aaye,
Wo aankhon se keh diya karo..
Kuch baatein kehna mushkil hain,
Tum chehere se padh liya karo..
Jab tanha tanha hote ho,
Aawaz mujhe tum diya karo..
Har dhadkan apni tere naam karu,
Tum har saans mujhko diya karo..
Jo khushiyan teri chahat hain,
Ab mere daman se chun liya karo..
Aankhon se behte hue aansuo ne pucha
Kya thi khubi usme,kyun tujhe vo achha laga
Maine kaha usko jab dekha vo mujhe apna laga
Uski khamoshiyan meethi lagi,uska bolna sachha laga
Uski baato se dil mein aarzuein badhti gayi
Uski khaatir zamane se ladna achha laga
Meri ankhon ki chamak mujhe uski lagi
Uske sine me jo dhadakta wo dil mujhe apna laga
Waqt guzra jab vo mujhse bichad gaya
Un judaaiyon me bas use yaad karna achha laga
Ek andheri raat me koi musaafir mujhe tanha dikha,
Maine use aawaaz di mujhe mera sapna sachha laga
Tu bas gaya hai meri rag-o-jaan me jabse,
Kisiko apni saanso me basane ki chaahat na rahi,
Tujhe maanga tha maine bhi rab se apni duao me,
Tera siva khuda se koi rehmat ki chaahat na rahi,
Tere saath hi aayi thi khushiyan bhi mere aangan me,
Tere baad in honthon ko muskurane ki aadat na rahi,
Kuch iss kadar se chupaya hai tujhe apne dil me,
Ki dil ko teri dooriyon ki shikayat na rahi,
Kuch iss kadar se sajaya hai tujhe apni aankho me,
Ki ab inhe bhi kisi aur khwaab ki chaahat na rahi,
Kuch iss tarah se ki hai maine Tamanna teri,
Ki meri zindagi ko tujhbin koi hasrat na rahi,
Bhari mehfilon me bhi khudko tanhaa dekha maine,
Iss anjaani bheed me khudko milane ki chaahat na rahi,
Ye to suna tha ki kat-ti ha zindagi judaiyon ke baad bhi,
Magar sun mujhe teri yaadon se badhkar koi ab shiddat na rahi .
Raaste badal jaate hain,
Manzilein badal jaati hain,
Kyun nahin badalte ye dil,
Jo yun taqdeerein badal jaati hain
Dil wohi rehta hai,
Yaadon ki parchaiyaan le ke,
Aankhon ki nami chupa kar,
Ye nazarein badal jaati hain
Rooh rehti hai har lamha ashkbhar,
lekin ye lab hanste hain,
Bahar aur andar ki na jaane
Kis tarah ye fizaaein badal jaati hain
Koi hota hai rafta rafta zindagi se door,
Haathon ki yeh lakeerein kyun aksar badal jaati hain !!
Hum likhna bhul gaye
Jabse hue woh paraaye
Mausam badle bichde saaye
Fizaaye badli aur yeh hawaaye
Hum
hasna bhul gaye
Ghumo ke baadal jabse chaaye
Tanhaaiyan dost ban gayi
Jab se diye hai usne bujhaye
Ansu bhi beh jaate hai
Teri yaad jab jab hume sataaye
Jeena phir bhi seekh gaye
Hai
tujhe dil me chupaye
Hum likhna bhul gaye
Jabse hue woh paraaye………
Raat ka aakhri pehar tha,
Mujhse chaand ne kaha,
Ae mere hum nasheen alvidaa,
Mujhe neend aa rahi hai,
Kal phir milenge isi jagah,
Maine sun kar muskura diya,
Phir usko batla diya,
Jaanay wale laut-te nahi,
Maloom hai tum nahi aaoge,
Mujhe hai ye yaqeen,
Meri isi baat ko sunke woh ruk gaya,
Aur mujhse kehne laga,
Mai tumse wada karoon,
Aur phir poora na karoon,
Aisa mumkin hi nahi,
Sun le ae humnasheen,
Main chaand hoon insaan nahi'..
Mere zehen me jo palta raha,Vo bas tera hi khayal tha,
Meri num aankhen jo karti rahi,Vo tera hi intezaar tha,
Dil jiske liye betaab raha,Vo teri ankahee baatein thi,
Bebass meri inn dhadkano ko,Ek bas teri hi chaahat thi,
Tune kabhi na ki izhaar-e- mohabbat ,Shayad teri bhi koi majboori thi,
Dil jis-se har pal darta raha,Vo tere mere beech ki ye doori thi,
Dil ne tujhse milna chaha,Shayad vo meri dillagi thi,
Be-dedaar tujhe apna mana,Shayad vo meri dilkashi thi,
Har dua me tujhe maanga,Shayad vo mera dewaanapan tha,
Bheed me khudko tanhaa paaya,Shayad vo mera akelapan tha,
Meri saanso ne no jo mehsoos kiya,Vo tera hi ek ehsaas tha,
Meri soch me jo samaa gaya,Vo tera hi aks tha,
Meri soch ,meri chaahat,mera dil,meri raahat,
Teri baat,teri adaa,meri khwaahish thi bas teri ek sada,
Kaash ek baar tu palat kar dekh to leta,
Mai wahi tha jahan tum mujhe chodh aaye the,
Ab saath hai inn raahon par teri yaadien aur meri khamoshi ..
Aaya tha kabhi tu mera ajnabi dost bankar
Ab tujhe apni zindagi banane ki khwaahish hai
Tere aane si saji thi muskaan mere honthon par
Ab tujhe apni har pal ki hansi banana ki khwaahish hai
Kabhi mila tha mujhse tu mera khayal bankar
Ab tujhe khayalo ki haqeeqat banana ki khwaahish hai
Dhadak uthta tha ye dil jo teri har ek aahat par
Ab tujhe apni dhadkan ki tarah dil me basaane ki khwaahish hai
Mere har gham ke aansu ke saath tu bhi khudko bahata raha
Ab tujhe apni khushi banakar saath nibhane ki khwaahish hai
Ek tu hi to tha tanhai me mere ehsaas ki tarah
Ab tujhe bas naam-e-zindagi dene ki khwaahish hai
Koi to ho jo inn raahon par mera haath thaam leta,
Koi to hota jo mujhe mere aks se milwa deta,
Jiska khwaab liye har raat behti hai aankhe meri,
Koi to hota jo mere aankho me aakar bastaa,
Jiski aahat ke liye tadapti hai dhadkan meri,
Koi to hota jo mujhe apne dil ki dhadkan banata,
Uski talaash me bhatakti hai aanhe meri,
Koi to hota jo un aanho ko mehsus karta,
Mera saaya bhi dur hai,saath bas tanhai hai,
Koi to hota jo mujhe apni aaghosh me chhupa leta,
Ye lafzon ka khel ab lagta hai purana mujhe,
Koi to hota jo in lafzon ki tehreer banta,
Raat ki khalik me tutkar bikharta raha har khwaab mera,
Koi to hota jo unn tukdo ko sametkar taabeer karta,
Anjaani mehfilen sajti dekhi har taraf maine,
Koi to hota jo meri tanhai me aakar sajta,
Benaam manzil ki talaash me benaam mera thikana hai,
Koi to hota jo meri zindagi se meri pehchaan karwata
Recent Comments