Panditji ki Bhavishyavani

Ek baar ek aadmi ek pandit ji k paas apni kundali dikhane k liye gaya aur pandit ji se kaha ki pandit ji, jara dekhiye ki mei kundali mein kya hai. Panditji ne uski kundali ko bina dekhe huye hi jawab diya ki jao, aaj se ek hafte (8 days) mein tumhari taang (leg) toot jayegi. Ab to bichara wah aadmi ghabra gaya aur panditji ko dakshina dekar apne ghar chala aaya. Ab to us vyakti ko chinta ho gayi ki ek hafte mein meri taang toot jayegi. Ab kaun sa upaay karoon ki meri taang na tootane paaye.

Dheere dheere wah din bhi aa gaya jis din uski taang tootne waali thi. Panditji ne phone karke poochha ki kyun bhai, kya hua. Tumhari taang tooti ki nahin, to us aadmi ne jawab diya ki panditji abhi to nahin tooti hai. Panditji ne kaha ki koi baat nahin, abhi nahin tooti hai to toot jayegi. chinta mat karo. ab to ush aadmi ki haalat aur bhi kharab ho gayi ki meri taang to ab koi nahin bacha sakta. Kyunki jab pandit je ne kah diya hai to taang to tootni hi hai. Kuchh der baad pandit ji ne phir phone kiya, kyun bhai, taang tooti ki nahin. To us vyakti ne jawab diya ki abhi nahin. Panditji ne kaha ki, bhai kyun jyotish ki hansi udvate ho. Apni ek taang tudwa lo na. Dheere dheere poora din beet gaya, lekin us vyakti ki taang nahin tooti.

Shaam ko us vyakti ne panditji ko phone kiya ki panditji, poora din to beet gaya, lekin abhi tak to meri taang nahin tooti hai, kya abhi grah baki hai ya ki beet gaya. To pandit ji ne kaha ki arrey bevkoof, kundali to main apni dekh raha tha to tumhari taang kaise tootati.